1944-mi augustimi nunaqarfiit marluk Kalaallit Nunaata kujaterpiaaniittut, Sammisoq aamma Itilleq, inuerutitaapput. Tamanna ukiorpassuarni Landsrådini siunissami nunassittarnissaq pillugu oqallinnerup inernerigallarpaa.
Nunap inerisikkiartuaarnissaa anguniarlugu innuttaasunik katersortitsinissaq Landsrådit akuersaarpaat, danskilli qullersaasut inuit namminneq piumasaannut akerliusumik iliuuseqarniarnatik - tassa Sammisup Itillillu matuneqarnissaasa tungaanut.
 
Atuakkami taama oqallinneq ingammik Nunap Isuata eqqaani pisut malittaralugit eqqartorneqarput. 1900-kut aallartinneranni taqqavani inuit 600-t sinneqartut asimioqarfinni aqqanilinni najugaqarput. Ukiut 100-t affaat qaangiummata affaannaannik amerlassuseqalersimapput, tamatumalu nalaani asimioqarfiit marluinnanngorsimallutik.
 
Einar Lund Jensen, Naalakkersuisut 2019, qupp. 162